طورطة لبيسكوي والموز

طورطة لبيسكوي والموز
هادي طورطة ساهلة بالبيسكوي والموزالكركاع مع الميرانغ لمنال العالم جربتها وجات رائعة بالنسبة للمقاديرغادي نحتاجو
بسكوي بكية الى بكية ونصف حسب الكبر ديالها وتقدرو تديرو دوائر اومربعات
كريم باتسيير مايعادل نصف لتر من الكريم
4الى 6 موزات
وزلافة صغيرة كركاع مهرمش
بالنسبة للكريم باتسييرمنال العالم دارتو فهاد الوصفة بطريقة مختلفة طيباتو بطريقة حمام مريم انا اتبعت نفس الطريقة ولقيت بان حتى الكريم باتسيير اللي مولفين كتصابوه تقدرو تديروه غير مايكونش حلو بزاف هدا اللي غنحط جا شوية حلو بزاف خصوصا وانه كاينة مزال الطبقة دالميرانغ
بالنسبة للمقادير
3/4كوب سكر(شفتو شوية بزاف خصوصا ان العبار دالكوب هو مايعادل الكاس اللي كيهزربع لتر ماء واللي عزيزة عليها الحلاوة بزاف تتقيد بالمقادير هههه)
شوية ملحة
1/3كوب دقيق
4بيضات الاصفر فقط والبياض غادي نحتاجوه للميرانغ
2كوب حليب
1فاني
1ملعقة صغيرة قشرة الحامض او الليمون
كنخلطو كلشي فمرة فشي اناء ونطبيوه بطريقة حمام مريم ونبقي نحرك حتى يثقال.طبعا كنكرر تقدرو تديرو الكريم اللي مولفين كتديروه بقياس نصف لتر حليب.
فشي طاوة او صينية تكون صالحة للتقديم وفنفس الوقت كتدخل للفرن كنفرشو فيها طبقة من البيسكوي كنقطع نصف كمية الموز الى دوائر ونفرشو حتى هو وكذلك الكركاع كنكب نصف الكمية دالكريم كنكمل بنفس الطريقة
الميرانغ نكونو طربناه من قبل ووجدناه طبعا كنطربو هادوك 4 دالبياض اللي بقاومع قبيصة دالملح حتى يولي بحال الثلج ثم كنزيد 1/2 كوب سكربالتدريج حتى نحصلو على مرانغ قاسح كنديروه فوق الطورطة بشكل عشوائي كما درت انا او تديرو بالبوش وتدخلوه للفرن شاعل من لفوق على حرارة متوسطة ديرو الصينية لتحت باش تتحمر على خاطرها كنخليها تبرد انا قدمتها كما هي .وهي زيناتو بصلصة التوفي انا قلت مع راسي باركة عليا غير هاد الحلاوة ههه.