جديد! تزيين بلطوا بقشور البيض
جديد! تزيين بلاطو بقشور البيض
السلام عليكم و رحمة الله تعالى و بركاته
1
2
3
انيقاتي ليوم جيت نوريكم واحد البلاطو ديال الخشب مكنتش كنحملو حيت كيشد فيه الوسخ و قدام مبقا فيه ميتشاف لكن راجلي عزيز عليه كيفكرو بايام العزوبية ههههه لدرجة اني لحتو واحد النهار و شافو راجلي و رجعو ايوا مين شفتو لاصق لاصق فيا قلت اجي نحلق عليه شوية هاهو قبل التعديل و بعد
المهم اول خطوة درت جمعت قشور البيض وقت ماكنستعمل شي بيضة كنغسلها و نخليها تقطر حتى جمعت الكمية لي غادي تكفيني
من بعد جبت واحد البينوار عندي قديم و مقطع ديال ساتان
وقطعت منو الوريدات و العروشة لي فيه و فينيتهم بالبريكا باش ميبقاو الخيوطا خارجين
من بعد جبت كولا ديال الخشب هادي خذيتها ب 7 دراهم
ودرتها فطويسة مع كوتونتيج
وبديت لصق في قشور البيض خطوة خطوة
من بعد مساليت خليها تنشف ليلة كاملة و لغد ليه صبغتها بصباغة بيضاء مقاومة للماء كانت شايطة لي من صبغت واحد الشوفو
جبت دوك الوريدات الحمر وبديت لصق في البلاطو
لصقت الوريدات و العروشة
ودرت شوية ديال البريو كان عندي وخليتها تاني حتى نشفات على خاطرها
لصقت في جناب سكوتش و دوزت صباغة حمرا باش يجيني خط احمر
خليتو هنا حتى نشف
حتى ساليت عاد فكرت ندير ليه اليديدات ومشيت خديتهم من دروكري ب 6 دراهم للواحد وعطاني معاهم فيسات كبار لكن معجبونيش غادي يجيو خارجين و شريت فيسات صغار
درتها في يد الله و تقبت البلاطو في جناب بالشينيور من الاحسن يتتقب في الاول لكن حتى الاخر لحظة عاد فكرت و الصراحة واخة الشينيور خدام فوقو حتى وردة و حتى قشرة ديال البيض متقلعات من بلاصتها بقا هو هو
وركبت اليديدات ديالو
وهاهو البلاطو ديالي لي كان غادي يتلاح
دعيو معايا ربي يسهل عليا