تحضير الفلفلة معمرة لديدة وكتشهي
تحضير الفلفلة معمرة لديدة وكتشهي
1
2
3
مقادير وطريقة التحضير
كناخدو الفلفلة بالألوان أنا هنا درت غير 3 كيبقى لكم الاختيار تديرو أكثر على حساب عدد الأفراد ويمكن تديرو الفلفلة الخضرة بوحدها حتى هي كتجي غزالة
كنغسلوها ونحيدو ليها الراس ونخويوها من الداخل
وناخدو بصلة صغيرة نقطعوها مربعات ونديروها تشحر فشوية الزيت البلدية وشوية الملحة حتى تدبال
ونزيدو عليها رابعة ديال الكفتة ونخليوها حتى هي تشحر على نار مهيلة ونفس الوقت نكونو درنا زلافة صغيرة أو كاس كبير ديال الروز كلاسي يتسلق
منين يتسلق الروز نزيدوه على الكفتة ونزيدو شوية القزبر
والمعدنوس والابزار وسكنجبير والزعفران والملون أما الملحة فعلى حساب الدوق
حتى تولي بحال هكدا ونخليوها تبرد على جنب
ناخدو طنجرة تكون واسعة شوية أو كوكوط كبيرة ونحكو فيها 3 مطيشات كبار ونص بصلة وندرو معاهم معلقة ديال مطيشة الحك وشوية الزعتر وورقة سيدنا موسى والقزبر والمعدنوس والملحة والابزار وسكنجبير والزعفران والتحميرة والملون والزيت البلدية والرومية ونخليوهم يغلاو مزيان
منين يغلى مزيان ناخدو الكفتة مع الروز ونعمرو بها لفلفلة ونديروها فالطنجرة بالحق ضروري الفلفلة تكون مقادة من التحت باش توقف مزيان وما تقلبش لينا العمارة
نسدو عليها فالطنجرة حتى نحسو بها طابت بالحق ما نخليوهاش حتى طيب بزاف باش ما تقبش وتخرج منها العمارة
ملي طيب نخرجوها من الطنجرة ونديروها فشي طبسيل ونخليو لصوص حتى تعقاد مزيان على هاد الشكل ونديروها فشي مول كيدخل للفران
نحطو الفلفلة فالمول غير بشوية لا تخرج العمارة ونديرو فوقها الفرماج محكوك وندخلوها للفرن غير حتى يدوب الفرماج
وهاهي الفلفلة معمرة لديدة وكتشهي واجدة تقدم في نفس المول لي طابت فيه أو صحن آخر
بالصحة والراحة