تيراميسو جد رائع بالصور الموضحة

تيراميسو جد رائع بالصور الموضحة
هاد التيراميسو بالفرومبواز و الله كلمة رآائع قليلة فحقه ديسير راقي و خفيف و مافيهش العداب و المزيج ديال الحامض و الفرومبواز كيعطي مداق مميز و حتى اللي بغاو يبدلو الروتين ديال التيراميسو العادي او اللي ماكتعجبهمش المرورية ديال القهوة و الشكلاط و الاهم انه كيحمر الوجه قدام الضياف اللي دآايما كيطلبو

المقادير الاساسية ديال التيراميسو اللي هي :
2 بيضات + 100 غ سكر + 250غ ماسكارپون + و بودواغ ( البيسكوي اللي على شكل اصابع ) و الاضافات هي :
250غ فرومبواز ( كان عندي مكونجولي ) + قشرة و عصير نصف حامضة + و سيرو ديال فواكه العشق او اي سيرو كتفضلوه ولكن هدا هو سر الوصفة كيعطيها مداق مميز

طريقة تحضير التيراميسو

كنفرق البياض على الصفار كنضرب البياض مع قبصة ديال الملح و كنخليه على جنب
كنخلط صفار البيض مع السكر و الڤاني و قشرة الحامض محكوك و كنضربهم مزيان غير بالخلاط اليدوي حتى يولي الخليط ابيض

و كنزيد عصير الحامض و الماسكارپون و كنخلط مزيان تم كنزيد بياض البيض و كنحرك غير بشويه حتى يتجانس الخليط

كنجيب السيرو و كنخلطه مع شويه ديال الماء و كنبدا نغمس صبيعات البودواغ فالسيرو و نستف فطبق التقديم

من بعد فرقت الفرومبواز و حاولت نخلي الوجه للخارج و فرقت جزء من الكريمة

و كررت العملية للمرة التانية

و فالاخير ستفت البودواغ و غطيتو بشوية ديال الكريمة المتبقية و ستفت فرومبوازات من الفوق و دخلته للتلاجة ليلة كاملة لانه التيراميسو شحال ما بقى عاد كيزيان و الكريمة كتشد