سفوف أو سلو مع اقتراحات رائعة للتقديم

سفوف أو سلو مع اقتراحات رائعة للتقديم
الوصفة من تحضير الأخت أم أسامة وايمان جزاها الله خيرا

مقادير سفوف أو سلو

2 كيلو دقيق محمر ملي غربلتو زوج مرات عطاني 1 كيلو و 650 غ
500 غ زبدة دايبة ومحيدة ليها الكشكوشة والحليب حتى هي عطاتني زلافة
وخديت منها غير الزبدة لي صافية مزيان
400 غ عسل مسخن باش يخفاف
سكر كلاصي حسب الدوق + نصف م ص ملح + م ك قرفة + نصف م ص مسكة + 125 غ زريعة الكتان محمصة ومطحونة ومغربلة + 50 غ نافع محمص ومطحون ومغربل
700 غ زنجلان محمص ومطحون + 300 غ زنجلان نخليه على جنب
+ 1 كليلو لوز مسلوق ومفسخ ومقلي كنحيد منو تقريبا 250 غ والباقي نطحنو النص خشين والنص مطحون مزيان
الزيت لي نقلي فيه اللوز غادي نضيف منه القياس لي بغيت للسفوف

طريقة تحضير سفوف أو سلو بالخطوات المصورة

نسلق اللوز وكنقشرو بهاد الطريقة كتسهل عليا وسريعة
كنعمل اللوز فصريرة ونبقى نعرك فيه بيدي ونحيد لي تقشرو ونكرر العملية حتى نساليه ونزلو على فوطة نقية باش ينشف مزيان

كنقلي اللوز فزيت يكون سخون وغير نزلو فيه كننقص شوية من العافية باش يتكرمل مزيان
في نفس الوقت عملت الزبدة تدوب على عافية مهيييلة وغير تدوب كنخليها تبرد على خاطرها ومنبعد نحيد ديك الكشكوشة وناخد غير الزبدة لي صافية مزيان
فالوقت لي كانت الزبدة كتبرد حمصت 700 غ الزنجلان وزريعة الكتان والنافع وطحنتهم
وطحنت اللوز كيف قلت النص خشين شوية والنص محطووووون مزيان

كنعمل الطحين في بانيو كبير باش ناخد راحتي فالتخلاط وميبقاش شي يهرق من هنا وشي من لهيه ههههههههه
ونضيف عليه كلشي إلا الزيت والزنجلان واللوز لي خليت صحيح
وحيت البانيو كبير كنعمل الشغل د المعكازين هههههههه الزبدة والعسل كنعملهم حتى هما فوحد الجهة
ونبدا نخلط النواشف وعاد نجمع لعندهم الزبدة والعسل
منين كنكون كنخلط كنعمل الزنجلان لي احتفضت بيه يتحمص وكنضيفو وهو سخون للدقيق ونخلط مرة أخرى مزيااااان وندلك باش النكهات تنساجم مع بعضها
وريحت الزنجلان سخون طالعة امممممم
فالأخير كنبدا نضيف الزيت ونقيس من الحلاوة إدا لقيت باقي خصني يكون حلو نضيف السكر كلاصي وهاهو واجد
هاد القياس عطاني 5 كيلو ديال السفوف + 50 غ

إقتراح لتقديم سلو أو السفوف

كناخد الغطا دالطاجين ونغسلو ونشفو مزيااااان ونقلبو ونعمرو بالسفوف وانا كنضغط عليه حتى نعمرو كامل
ونغطي بالطبسيل ونقلب ونزين باللوز والسكر كلاصي
ممكن تحتافضو بيه بهاد الطريقة كتغطيه بفيلم أليمونطير وتغلف بورق الألمنيوم
وملي تبغيه كتغرف منه القياس لي بغيتي وكيبقى شاد راسو بلا ما يطيح