فلفلة معمرة بالروز والكفتة بالصور
المهم كناخد الفلفلة فالألوان أنا هنا درت غير 3 كيبقى لكم ألإختيار تديرو أكتر على حساب عدد الأفراد ويمكن تديرو الفلفلة الخضرة بوحدها حتى هي كتجي غزالة
1
2
3
كنغسلها ونحيد ليها الراس ونخويها من الداخل
وناخد بصلة صغيرة نقطعها مربعات ونديرها تشحر فشوية الزيت البلدية وشوية الملحة حتى تدبال
ونزيد عليها رابعة ديال الكفتة ونخليها حتى هي تشحر على نار مهيلة ونفس الوقت نكون درت زلافة صغيرة أو كاس كبير ديال الرز كلاسي يتسلق
منين يتسلق الروز نزيدو على ديك الكفتة ونزيد شوية القزبر والمعدنوس والبزار وسكنجبير والزعفران والملون أما الملحة فعلى حساب الدوق
حتى تولي بحال هكدا ونخليها تبرد على جنب
وناخد طنجرة تكون واسعة شوية أو كوكوط كبيرة وحكيت فيها 3 مطيشات كبار ونص بصلة ودرت معاهم معلقة ديال مطيشة الحك وشوية الزعتر وورقة سيدنا موسى والقزبر والمعدنوس والملحة والبزار وسكنجبير والزعفران التحميرة والملون والزيت البلدية والرومية ونخلهم يغلاو مزيان
وعلى فكرة هادي هي لصوص لي كندير فجميع أنواع لي باط كيجو غزالين بمداق الزعتر
منين يغلى مزيان ناخد ديك الكفتة مع الروز ونعمر بها ديك الفلفلة ونديرها فالطنجرة بالحق ضروري الفلفلة تكون مقادة من التحت باش توقف مزيان وما تقلبش لينا العمارة
ونسد عليها فالطنجرة حتى نحس بها طابت بالحق ما نخليوهاش حتى طيب بزاف باش ما تقبش وتخرج منها العمارة
ملي طبيب نخرجها من الطنجرة ونديرها فشي طبسيل ونخليو ديك لصوص حتى تعقاد مزيان على هاد الشكل ونديرها فشي مول كيدخل للفران
ونحط الفلفلة ديالي فالمول غير بالشوية لا تخرج العمارة وندير فوقها الفرماج محكوك وندخلها للفرن غير حتى يدوب داك الفرماج
هى كيفاش كيجي الشكل ديالها بغيتي تقدميها فالمول تبارك الله بغيتي تقدميها فأطباق بشكل فردي حتى هي كتجي زوينة
وحتى الروز ديال العمارة كنتعمد نشيط منو وكنديرو أطباق جانبية مع المايونيز ولكيتشوب