دجاج فالفران بطريقتي
دجاج فالفران بطريقتي
دجاج فالفران بطريقتي .. سهل و بنين و صحي و ما كيشدش اليدين
الدجاج فالأكل اليومي المغربي ماشي غير مرقة ولا كسكسو ولا مبخر ولا محمر
كاينة وصفة كتجمع ما بين العصري و التقليدي و الذوق العالمي و المغربي
بداية كناخذو دجاجة ولا نصفها ولا على حسب قطع الدجاج اللي عندنا
كنغسلو الدجاج عادي و نزولو ليه الجلدة (إذا حبينا) و نخليو قطع متوسطة
نديرو الدجاج فسوبيرة و نكبو عليه العطرية (خرقوم، راس معلقة البزار، ملح حسب الذوق، ثومة مدقوقة، ربيع مقطع، سكنجبير) و أهم شي دانون مسوس أو ما يسمى بالروب (يوكرت طبيعي)
نديرو الغطا ديال السوبيرة و نحركو كلشي حتى يتحرحر ههه تخلط العطرية مع دانون ويصبح الخليط أصفر و كيغطي قطع الدجاج كلها
نتركو السوبيرة تبات فالثلاجة أو نديروها الصباح باش نطيبوها فالليل( باش الدجاج يشرب العطرية)
سخني الفران على حرارة 180 درجة و ديري قطع الدجاج على اللاطة مفرش ليها الأليمينيوم و غطيه بالأليمينيوم كذلك (باش يطيب و ما يتحرقش من الفوق) و طيبيه لمدة نصف ساعة تحت و 15 دقيقة الفوق
قدميه بالصحة و الراحة مع زعلوك ولا تكتوكة و لا سلطة على حسب الاختيار
بالصحة و الراحة
1
2
3