طاجين ديال الحوت
طاجين ديال الحوت
اول شيء رقد الحوت في العطرية كاملة معروفة وغندكر بيها للمبتدئات ملح بزار كامون تحميرة شوية ربيع وتوم مفروم وعصير الحامض وشوية ديال زيت العود ولي بغا الحار يضيفوا هو مداروش على قبل بنتي باقا صغيرة
1
2
3
الان بغيت نكول ليكم الطاجين تهرس وعوضوا راجلي بهاد الكاميلة بحال الطاجين تقريبا
المهم فرش اول شيء خيزو وبطاطا وفلفلة خضراء
تم نزل الحوت ومنساوش تكبوا زويتة ديال العود
تم ضاف مطيشة ديال الحك طلقها في شوية ماء طايب
من بعد عاود ستف خيزو
ت بطاطا
تم مطيشة وفلفلة دوائر
من بعد دار واحد حبيبات ديال القرنفل وورقة سيدنا موسى
تم الزيتون ديال الدار عطاتو ليا ماما الله يخلف عليها ويخليها ليا يارب
تم زوق بالحامض مصير واحد دائرة ديال الحامض
واخر مرحلة في زليفة صغيرة دار املح بزار تحميرة كامون خرقوم و الربيع وخلط الكل بالماء غير القياس لي غيطيب فيه الحوت مع الخضر متكتروش حيت راكم عارفين الحوت كيطلق الماء ديالو وسقا بيه الطاجين
ايوا دابا هاهو كيغطي فيه باش يديه للبوطة يطيب
واخيرا نزلتو في الطبسيل باش نتغداو
انتم الى درتوه في الطاجين ديال الطين غتنزلوه كيف ماهو متحتاجوش الطبسيل وغيجي فيه افضل لدة ديال الطين غتجي بنة ولدة لا تقاوم
وكالعادة اسالك الدعاء بفك كربتي بالعمل يارب عجل لي بفرج قريب
الله يعطيكم الصحة ويجازيكم الف خير لا تنسوني من الدعاء لي ولوالدي ولاسرتي ككل ويجعل اولادي واولادكم من الدرية الصالحة ككل فدعاء الغريب والغائب مستجاب
الحمد لله الدي اطعمنا هادا من غير لا حول لنا ولا قوة