المقادير :
4 دجاجات مغسولين مزيان ومرقدين في الملح والحامض كيف العادة ومشلين مزيان وناشفين
شرمولة
3م ك ربيع مطحون (المعدنوس اكثر من القزبور)
م ك ابزار
1 و1/2 م ك سكين اجبير
م ك خرقوم بلدي
لب 2 مصيرات صغار بلديين
الخرقوم العادي
زعفران شعرة انا عملت 20درهم النصف في شرمولة والنصف في المرق
كنور بقري
ضامة زعفران واحدة
راس كبير دالثومة مطحون
نصف م ص مخلطة بسيبيسة وقعقلة ( بسيبيسة اكثر من قعقلة)
عصير حامضة كبيرة
الماء لي يطلق شرمولة جهد كاس كبير
للطنجرة
زيت الزيتون وزيت العود صراحة عملت عيني ميزاني معبرتشي يقدر يكونكاس عنبةكبير
م ك سمن
بصلة محكوكة
الماء الكافي
1
2
3
للدغميرة
10 البصلات مشلدين
كنور بقري
قليل جدا من ابزار وسكين اجبير وخرقوم وسمن
مرق من الطنجرة
قشواش دجاج مسلوقين في ماء و ملح وحامض
للزينة
اناناس ومشماش معسلين
الطريقة
نشرملوالدجاج جيدا من الداخل والخارج وما بين الجلدة واللحم (انا تنعمل شرمولة في الطنجرة وتنشرملوفيها ) ونتكوه مزيان بقطيب
ونخليوه ساعة على جنبوحتى يبان لينا نشف ثم نقلبوه على الجنب الاخر ونتركوه ساعة اخرى والطنجرة تكون محلولة منغطيوهش باش ينشف بسرعة
ونمرقو بالماء بارد حتى يفوت نصف الدجاج بقليل ونعملوه يطيب على نار في الاول تكون قوية حتى يغلي ويعاود ونزيدو السمن ثم نقصوونخليوه يشرب
شي10د ثم نضيفو الزيت ونخليوه يطيب نصف ساعة ونقلبوه على الجنب الاخر ونضيفو البصلة المحكوكة وليبقى من زعفران محكوك ونفاوتو على الطنجرة
لغطى كيف الصورة رقم 3 ونخليوه يطيب على نار قليلة ومنحركوهش نهائي ولما يبرد تماما و نزولوه ونخليو المرق جانبا حتى طيب الدغميرة
والدجاج نزلوهونعملوه في لاطة حتى يبرد مزيان ثم نقليوه في حمام زيت اي يكون عائم في الزيت مع م ص سمن اوزبدة انا عملت السمن
طريقة الدغميرة
في طنجرة الضغط نعملوالبصلة والعطرية المدكورة ومغرفة كبيرة من مرق الدجاج من بعدما يكون طاب
ولقناصي ولعنيقات ونشدوعليها حتى طيب على نار قليلة ونزيدو عليها مرق الدجاج ونمنزولوش يدنا منها بالتحراك حتى تتعلك مزيان ونضيفوعاد الكبدة ونحركو بالمهل باش متحلش ومنين يطلع الزيت الفوق صافي نطفيوعليها
التزين
في مقلاة نضع م ك زبدة +2 م ك سنيدة ونخليوهم حتى دوب الزبدة ونوضعو اناناس ونخليوه حتى يتعسل ومباشرة نفندوه في اللوز مفسخ ومقلي ومهرمش
والمشماش يطيب في الماء + قليل سكين اجبير + قبصة ملح + عود قرفة+ ونعسلوه بالسكر وم ك مربى مشمش ونفندوه حتى هو في اللوز ونزينو بهم الدجاج مع رشة لوزصحيح على الوجه
وبالهنا والشفا
نصيحة
– الدجاج لمدغمر متعملشي فيه الملح لا فشرمولة ولا فنصيب لانه فيه وادكثيرة مالحة ( هومرقد في الملح يعني شارب + كنور+ السمن +لمصير +ضامة زعفران )
– باش الجلدة مطرقطش للدجاج منقيصوهش نهائي من بعد منقلبوه سواء على الجنب الثاني اوعلى صدرو ونضيفو بصلة وحدة محكوكة
ونمنزولوهش من الطنجرة حتى يبرد تماما لان الجلدة تتكون لاسقة في قعر الطنجرة ومنين تيبرد تتزول بسهلوة بوحدها
– باش ميتحلش الدجاج اثناء الطهي خاصو يطيب على نار مهيلة وميتغطاش كامل غير النصف فقط
– منين نضيفو مرق الدجاج على الدغمير منخويوش هاديك العطرية لي تتجمع في قعر الطنجة نحاولو نميلو الطنجرة على جنب ونخويوغير المرق
– عند التقديم تلقاوالزيت فوق الدغمير نحاولو نهزوه من الفوق ونخليو غير لقياس باش متجيش مزيتة بزاف
– منين نقليو الدجاج نوضعوه في لاطة ونغطيوه بمنديل ثم بقلع باش يبقى سخون وطري ميقصاحش