محنشة صريرات
محنشة الصريرات شكل جديد راقي غتبهروا الضيوف ديالكم بها
1
2
3
محنشة صريرات
المقادير =كيلو ونص لوز مسلوق ومفسخ وكناكد على هاد القضية خاصو ينشف مزيااااان باش يجي لديد و نقليوه فزيت باردة وعافية مهيلة و حيدوه قبل ما يولي اللون غالق حيت كيزيد يغلق ليه اللون ملي كيتحيد من الزيت
غنحتاجو جوج حكاك نستلي
والحك نستلي خاوي نعمروه بناباج
غنخلطو هاد المقادير كاملة منغير اللوز ونوضعوها فوق النار مع التحريك غير يولى الخليط تقيل و يتغير اللون غيولي لونو كراميل شوية ماشي تيتحرق وعاد تنخويوه على اللوز ونخلطو المقادير حتى يندمجو ومغتحتاجو حتى حاجة اخرى كيجي الخليط هو هداك كندهنو يدينا بالزيت و غنكوروه كامل كويرات صغار
غنحتاجو كيلو الورقة
الزيت كناكد الزيت بلا زبدة باش تجينا مقرمشة انا دائما البريوات و المحنشة كنخدمهم بالزيت الا البسطيلة اللي كنخدمها بالزبدة
غنحتاجو شوية اللوز كونكاسي محمر للتزيين و بيضة للدهن
شوية الكراميل كيتباع جاهز هداك اللي كيعملوه فوق لاكلاص
والا بغيتو تعملو بحالي غتشوفو فالصور انني جبت الكنافة من الرباط حمرتها فشوية الزبدة و سقيتها بالعسل و
شتها من التحت كتعطي منظر رائع
الطريقة كتفرشو السلفرزي ضروري فطاوة و كتفرشو ورقة البسطيلة التحت و عاد تنقسمو الورقة على اربعةو كنعملو كويرة الوسط نغطسو يدينا فالبيض و نلويو صريرة و نبقاو نحطو وحدة قرب الاخرى حتى نكملو منساوش ديا كندهنو الورقة بالزيت و فالاخر كنغطوها ب ورق السلفرزي حتى تطيب من التحت عاد نعريوها ونحمروها من الفوق ملي نخرجوها الورق اللي فرشنا غيساعدنا ندفعوها للطبسيل بلا ميفسد الديكور و كنسقيوها بالعسل و ندردرو عليها اللوز و نزوقوها بالكراميل