تحضير صابلي باللوز بأشكال مختالفة

نحتاجو ل: 4/1 زبدة 2 كيسان سنيدة كاس ونصف زيت 3 بيضات 2 فاني 2 خميرة قشور البرتقال كاس لوز مطحون بقشورو كاس الكوك مطحون
للإشارة أنا عملت نصف المقادير
عملت البيض مع سنيدة والفاني و (وقشور البرتقال) مدرتهمش حيت مكانش عندي البرتقال وضربتهم بيديا مزيان

من بعد زدت عليهم الزبدة والزيت وخلطتهم مزيان حتى آنسجمات الزبدة مع الخليط كولو

من بعد زدت عليهم اللوز مطحون والكوك مطحون وخلطت تاني بيديا

وفالأخير زدت عليهم الدقيق والخميرة وجمعت العجين، العجين تيخاصها متكونش قاصحة، تكون مرخوفة شوية

قسمت العجين لزوج كويرات عاديين، وكورة زدت عليها غبرة ديان الملون باش عطاتني هداك اللون الوردي

من بعد سرحت العجين بين زوج بلاستيك الغذائي، ثم عملت منها هاد الاشكال، والعجين الوردي درت منو وريدات كبار للتزيين

ومنين طابو، هوما راه متياخدوش وقت كثيير فالفران، وضروري متراقبو الفران مرة مرة ومنين وجدو، بديت كنزوقهم بحال هاكدا
هادي بكونفتير الفريز واللوز وزوقتها من الفوق باللوز والكوك

وشي زوقتو بالشكلاط وحدو وشكل المربع لصقتو بكونفتير المشماش ودردت عليه السكر كلاصي وشي زوقتو بالشكلاط والبيسطاش عملت كمية من الشكلاط والزبدة فكسرونة وذوبتهم، ومن بعد عملتهم فالجيب حلواني وعملت هاد الشكل، ومن لفوق دردرت عليهم البييسطاش