وصفة طبيعية مجربة تنقي نيفك من النقط السوداء
اخواتي الغاليات ما كاين ما اعدا لنا من النقط السوداء فملي تتنظفي وجهك وتتعملي جميع الاهتمامات ديالك باش تحصلي على بشرة نقية وصافية وجميلة في نفس الوقت ولكن تتنساي او تتعكزي على الانف ديالك
1
2
3
والى لاحظتي تتبان لك شي حاجة ناقصة وهي النقط السوداء واضحة وباينة وخاصة بعد العناية بالبشرة كما قلت لانها تتزيد تظهر اكثر وتبان ولهذا اليوم جبت لك وصفة تقضي عليها ولكن المداومة باش ما ترجعش لانها تتراكم بسبب الاوساخ وتتقفل المسام
والى ما زولناهاش تتزيد تكبر وتعطي منظر قبيح للبشرة وخاصة ملي تتبغي تعملي الماكياج تيبان الانف بحال الزرواطة هههههههههههه ما نخلعكومش غير خاص هاذ النقطة تنتابهوا لها بزاف بلا ما نطول عليكم نجيوا للموضوع
اول شيء غادي نحضروا هو حمام البخار الي بلا به ما تفتح لك المسام وما تقدري تخلصي من النقاط السوداء
لتحضير حمام البخار غادي نحتاجوا فيه :
كمية من النعناع بسيقانه شوية البابونج نصف حامضة مقطعة طريفات تغلي الماء مزيان بحال بغيتي تعملي اتاي وتعملي الكل في شي بانيو صغير
و تكبي عليه الماء
وتغطي راسك بفوطة وتخلي هاذ البخار يعمل الفوائد ديالو على البشرة حتى يبرد على خاطرو والمدة راه تقريبا 10 دقايق كافية باش تفتح المسام وتشبعي بفوائد البخار الصحي
من بعد تنشفي وجهك وتاخذي مراية تكون تتبين كبير وتاخذي كلينكس بين اصابعك وتبداي تخرجي في الفوسفاط راه غادي يكون ساهل باش يخرجوا، وتنصح باش يعمل لك هاذ العملية شي حد باش تكوني مستلقية و تساهل عليك العملية واي حبيبة صغيرة في الوجه كله تبان لها وتزولها لك ومن بعد مسحي بالماء ورد
وحضري القناع التالي : بياض بيضة طربيه مزيان وضيفي لو معلقة الطحين الفورص خلطيهم مزيان حتى يولي بحال العجينة وطلي به وجهك وركزي على الانف وخليه حتى ييبس على وجهك كله وزوليه بعناية وتشوفي وجهك نقي بزآآآآاف وصافي ومجبد لان هاذ القناع بعد الحمام تيجبد الوجه ويحارب التجاعيد وخالي من النقط السوداء وخاصة الانف غادي يبان لك الابيض وجميل
وهاذ الحمام مرة في كل 15 يوم باش ما يتراكموش النقط السوداء وارميوا عليا العكز وتهلاوا في روسكم ما يحك جلدك غير ظفرك
ايوا باقي باغي تزيدي بنيفك القدام راه الريش تيغلض النيف ههههههههههههه خلعتكم باش تنوضوا تباليوا بالنيف وتنقيوه الوصفة مجربة ومعتمدة دائما وبالصحة والراحة موفقات ان شاء الله .