شباكية هشيشة وبنينة من كوزينتي
السلام عليكم ورحمة الله اخواتي الكريمات رمضان مبارك عليكم وعلى الامة الاسلامية والله يجعلة مغفرة من الدنوب
اليوم جبت شباكيتي الهشيشة والبنينة خديت افكارها من بزاف د الانواع د الشباكية وخلاصة هاد الافكار طبقتها في شباكتي ونتمنى حتى نتوما تستافدو منها ودابا ندوز للمفيد وبنكتب المقادير
كيلو دقيق
ربع كيلو دقيق القمح
ربع كيلو زنجلان محمر شوية ومطحون مزيان
125 غرام لوز مصلوق ومقشر وحتى هو مطحون مزيان من الاحسن يتصلق ويتقشر ويبات ليلة عاد يتطحن
معلقة كبيرة نافع
معلقة كبيرة حبة حلاوة
معلقة كبيرة ماعمراش قرفة
1
2
3
زعفران حر كنسخنو شوية باش يسهال علي نطحنو غير بيدي
مسكة حرة شوية
نصف كاس زبدة
نصف كاس ماء زهر من الاحسن المقطر على اليد
نصف كاس زيت مخلطة بلدية ورومية
نصف كاس خل من الاحسن الخل الابيض
قبصة ملح
بيضة +صفار بيضة
شوية د خميرة الخبز غير شوية الحال سخون دابا
العسل وزيت للقلي وزنجلان للتزيين
ودابا ندوزو للطريقة
كناخد جميع المقادير الجافة كنخلطهم في قصرية مزيان حتى تتجانس الامواد
كنضيف ليها الزبدة والزيت ونبسبسها مزيان ونجمعها ونخليها ليلة كاملة في بلاستيكة غدائية ونخليها حتى للصباح باش كتتشرب وتطلق المواد في بعضها مزيان
في الغد كناخد الخليط اللي وجدت في الليل كنضيف ليه ماء زهر والبيض والخميرة ونخدمها مزيان من الافضل تبقى قاصحة والى شفتي انها ماتجمعاتس زيدي ليها شوية د ماء زهر او ماء عادي
نقسمها كرات ونغطيها ببلاستيك ونبدا نطلق مني نطلقها نطويها على هاد الشكل ونحط الطرف الايمن على الايسر بحال خدمة العجين مورق غير هدا مافيهش تمارا بزاف
ومن بعد نكمل الطليق حتى نحصل على السمك اللي بغيت ونبدا نقطع ونشبك تبارك الله كل الحادكات ديالنا كيعرفو يشبكو ولانني يد وحدة ماصورتش طريقة التشباك ونستفها في لاطات او بلاطويات حتى نكمل التشباك
عاد نبدى نقلي ونعسل الشباكية وخصك تكوني خفيفة باش ماتحرقش ليك الشباكية