شنيك بالخميرة البلدية مع طريقة تحضير الخميرة في الدار بالصور

شنيك بالخميرة البلدية مع طريقة تحضير الخميرة في الدار بالصور

الموضوع اينقاسم ل تلاتة الاقسام
القسم الاول هو تعريف بالخميرة البلدية
القسم التاني هو طريقة تحضير الخميرة البلدية في الدار
القسم الثالت هو شنيك بالخميرة البلدية

كنتمنى انكم تستافدو من هاد الموضوع
يقدر يجيكم طويل شوية ولكن كنضن اننا الى كنا كنصوبو الحاجة وحنا فاهمينها وفاهمين الالية باش تتوجد غادي نقدرو نبدعو فيها اكتر

نبداوعلى بركة الله

القسم الاول الخميرة البلدية

الخميرة البلدية او الخميرة الام هي مادة كنستعملوها باش كنصوبو الخبز وبزاف الانواع ديال الحلوى بحال الكرواصة والكيكة وما شابه..
وهي كنعوضو بيها الخميرة ديال الكحول او الخميرة الكيماوية 100في100 ..وهي اقدم طريقة لصنع الخبز.
كيرجع التاريخ ديالها لقدماء المصريين الي بالتاكيد كانو كيديرو الخبز فطير مفيهش الخميرة ومكيجيش زوين لانه كيجي رقيق وقاصح وشي نهار نساو الخبز مطيبوهش تا الغد و ملي طيبوه اكتاشفو انه جا منفوخ ورطب بحال الخبز ديال دابا.
ومن تما اكتاشفو ان الخبز الى خمر كيجي زوين ومن تما انتاشر عند اليونان.. وفي التوراة كنلقاو انهم استعملوها من قديم. ودابا منتاشرا بالخصوص في بعض الدول متل ايطاليا والمانيا وسويسرا وفرانسا واميريكا ..ومع الاسف انقارضات في المغرب.
وخاصكم تعرفو ان هاد النوع ديال الخميرة كيعطي بزاف الخصائص للخبز منها
-ان الخبز كيصبر وحتى كرواصة والبريوش بصفة عامة اي تقدري تاكليه من بعد يومين و تلاتا كخصك غير تسخنيه لاهو واتلقايه بحال الى يله طيبتيه
-انه ككون عندو مداق خاص لان كيف كنعرفو الخميرة العادية تتكون من نوع واحد ديال الباكتيريا في حين ان الخميرة البلدية تتكون من بزاف الانواع ديال البكتيريات الي تتكون منتاشرا في الجو وهي الي تتعطي البنة للخبز بحال ديال العروبية.
-ان الخبز كيجي منفوخ مشي مضقص اي وسط منو فراغات ديال الهواء مفشفش زعما.
-ان ككون سهل في الهضم وكيعاون حتى في هضم مواد اخرى الى كناكلوها معاه.
طولت عليكم ولكن كان ضروري ندير هاد المقدمة باش تعرفو هاد المعلومات المهمة او تتدكروها.

القسم التاني طريقة تحضير الخميرة البلدية في الدار

كاين الكتير منها انا اختاريت هادي

اتحتاجي ل
150g فورص
جوج معالق يوغورت طبيعي
معلقة العسل
ماء غازي والماس متلا الى مكانش ديري ما عادي
والكمية ديالو اتكون على حسب النوه ديال دقيق ديالك غالبا اتكون نصف كمية الطحين اي 75g

الطريقة

كنعجنوها وندلكوها مزيان.. القوام ديالها ككون بحال العجينة ديال البيتزا

وديريها في شي وعاء وغطيها بزيف يكون فازك وحطيها في مكان دافي تقريبا48 ساعة

من بعد كناخدوها ونخلطو معاها قدها ديال الطحين ونزيدوعليها نصها ديال الماء

متلا لقيتي فيها 300 اتزيدي عليها 150 ديال الما
وتعجنيها بالماء تاني بحيت انك تدلكيها مزيااااااان

وتجمعيها كورة ولكن تكون الكورة ديالنا مفيهاش فراغات في الداخل ديالها يعني تكون كورة مسدودة على نفسها

كتحطيها في وعاء مغطي تاني في مكان دافي 24h

الى كان الجو سخون خليها حداك في الكوزينة الى كان بارد وعندك السخانة ديال الدار خليها حداها
الى ما عندكش فمن الافضل ديريها وسط شي مانطا

والنهار التالت تتكون جاهزة للاستعمال

وهاهوالشل ديالها

هاد الخميرة ممكن تبقا عندك ديما

والطريقة ديال انها تبقا صالحة ومزيانة هي انك تربيها

اتقولي لي كيفاش

الطريقة انك كل نهار تكرري نفس العملية

ملي تنقصي منها متلا للعجينة ديال الخبز ديالك عاودي عبريها وزيدي عليها قدها طحين ونصها ماء ودلكيها مزيان وغطيها واحتافضي بيها للغد

انا اختاريت ليكم هاد الطريقة لانها هي الاسهل

كاين بزاف الطرق ممكن ببحت بسيط في الانترنت تلقايهم

وانا متاكدة انك الى جربتيها ما اتبقايش تستغني عليها الى مكنتيش معكازة طبعا لان نتيجتها مرضية بزاف كيف دكرت من قبل في كل المعجنات ديالك

ندوزو دابا للقسم الاخير من موضوعنا

250g خميرة بلدية الي وجدنا
275g دقيق هاد القاعدة عامة تا بالنسبة لباقي المعجنات متلا كرواصة الي كنت نزلت لكم ممكن ديروها بنفس الطريقة وزيدو باقي المكونات الي قدمت لكم
ومن الافضل في المعجنات الي تتستعملي فيهم العجينة مورقة ديري الدقيق ديال الحلوى
معلقة صغيرة ديال الملح
100gسنيدة
225gزبدة
نص كاس ماء
حليب اتجمعيها بيه غالبا تتحتاجي لنص كاس تل كاس لان على حسب نوع الدقيق
معلقة صغيرة النشا ديال بطاطة حرش ممكن تعوضيه بالنشا ديال الدرة مايزينا كيف سبق قلت لكم ان الدور ديالو انه كساعد لينا الخبز يتنفخ ويجي رطب ومشي مضقص
شوية الزبيب
كريم باتيسيير
شوية الكونفيتير دهنيه بيها من تخرجيها من الفران ممكن ديري العسل

الطريقة

بالنسبة للكريم باتيسيير انا تنوجدها بهاد الطريقة
3صفر البيض و 8معالق سنيدة 8معالق مايزينا ونص لتر حليب
كنطرب كلشي ونشعل عليهم عافيا مهيلة دون التوقف على التطراب تا تبدا غير شوية تتقال ونطفي عليها ونستمر في التطراب شوية
وهاهي واجدا

كنخلطو المكونات ديالنا
والزبدة خدي منها 125g

كنجمعو العجينة وندلكوها مزيااااااااااااااااااااااااااان
مزيان مزياااان

وباش تعرفيها انها دلكات هي او اي عجينة انك تولي تهزي طرف منها وتجبديه بلا ما يتقطع ليك لدرجت انها يبان لك لخيال ديال صباعك من تحتها بلا ما تتقطع بحااااال هكدا

فيها تامارا نييييت ولكن النتيجة تتكون راااااائعة و رحم الله عبدا عمل عملا فاتقنه

وهنا ملي دلكتها

حد ربع ساعة وارتاحي تانتي وشربي ليك شي كاس ديال العصير حيدي عليك السخفة هههههههه

ومن بعد سرحيها بالمدلك مستطيلة

وسرحي الزبدة ديالك الي بقات الي من الافضل تكوني دايراها في التلاجة

تم سرحيها على التلتين ديال العجينة وطويها طوية ديال 3

اتلقاوها مفصلةديال العجينة المورقة في موضوعي ديال كرواصة او الشنيك مورقة

ودخليها للتلاجة واحد 2 ساعات

من بعد خرجيها وسرحيها تاني وديري طوية ديال 4

رجعيها للتلاجة 20mn

وتاني طوية ديال 4 ورجعيها للتلاجة 20mn

صافي وسرحيها مستطيل ممكن تخليه عريض الى بغيتيها تجيك كبيرة انا تنفضل كلشي صغير
ومن الافضل تبقا شوية العجينة غليظة مترقيهاش بزااااف

دهنيها بالكريم باتيسيير والزبيب وروليها بحيت انك تخليها شية مرخوفة

ودخليها للمجمد 45mn

وملي تخرجيها قطعيها وخليها تخمر على الاقل 3ساعات

وبالصحة والراحة

شنيك بالخميرة البلدية مع طريقة تحضير الخميرة في الدار بالصور